Rauduonis Ignos
Gėmė 1935 metas.
Mėrė 2020 metas.
Gėvenamoujė vėita - Skouda rajuons, Giesalu kaims.
Žanrs - poezėjė.
Gėmiau prīš pat ontra pasaulėni kara. Kumet roskē pėrma karta užjiemė Lietova, mon bova vuos ketorė metā. Tās sunkēs metās ėr ištėka mon paralīžios. Mūsa bova daugevaikė šeima, tad nebova iš kor gīditėis. Vėns tievs toukart tedėrba muokītuojo, vo vākū buvuom aštounė: ketorė bruolē ėr ketorės seserės. Aš bovau mažasis, tad muokīkla Troikėnū miestalie pradiejau lonkītė tėk pu kara. Ėr tėisē ė ketvėrta klasė. Toukart tris metus muokiaus Īlakiūs. Ėr bova tuoks laiks, kumet vėsė kūrė kuplietus. Bondiau ėr aš. Tēp išejė, kad nu aštuntuos klasės pradiejau muokītėis Muosiėdie, kor ėr baigiau vėdorėnė. Tėn ėšmuokau gruotė vėsuokiuom mozėkuom, mėgėnau rašītė eilieraštius. Draugavau so Ričardo Pakalnėškio, Edvardo Rodio, Stasė Lėgotātė, Alma Skroibītė ėr kėtās. Vaidėnau dramas būrelie, huorė ėr tēp tuoliaus. Baigės vėdorėnė, muokiaus Klaipiedas pedaguoginie. Baigės pedaguogėni, pradiejau muokėtojautė ėr tou patio stodėjoutė Vėlniaus pedaguogėnemė institutė lietoviu kalba ėr lėteratūra. Dėrbau Kaukuolėkūs, Aleksandrijuo, vo Seduo, tazgaties, ėšdėrbau šešiuolėka metu. Unt gala apsėžanėjau ėr parsėkraustiau dėrbtė i Giesalus, kor ėšdėrbau dvėdešimt metu. Če padiejau žmuonā Reginā ėšaugintė do sūnos – Pauli ėr Marėju. Dabar eso užtarnautuos atuostuoguos ėr sava metus skėro kninguoms. Tēp 2006 metās ėšleidau „Ilgesė kluonē“, 2007 – „Lėkėma sūpuoklies“, 2008 – „Troikėnā“. Spalė pabaiguo – eilieraštiu vākams kninga „Medženuosis“. 2010 metās ėšlēsta biograpėnė kninga „Vestovėnis mozėkonts“. Tēp ėr trūkst tuo laika pavākščiuotė, paoustītė kvietkieliu, pasėklausītė, kāp mozėkou paukštelē.
Korėnē
Pruojekta rēm
Pruojekta ėgīvendėn
Ėnpuormacėnis pruojekta riemies
Partnerē
Pruojekta bėčiolis
